Kandidati i AKR-së për Prishtinën, Selim Pacolli ka komentuar Ligjin për Prishtinën të cilin e kaloi sot Qeveria e Republikës së Kosovës.

Ai ka thënë se ky ishte obligim i qeverive të kaluara por që sipas tij u vonuan ta kryejnë këtë obligim.

Qëndrimi i Selim Pacollit për Ligjin për Prishtinën:

Bashkëqytetarë të Prishtinës,

Qeveria e Republikës sē Kosovës sapo ka kaluar ligjin për Prishtinën, obligim ky kushtetues, të cilin u vonuan ta përmbushin qeveritë e kaluara.

Kjo vonesë në kalimin dhe humbjen e madhe të kohës e mundësive të cilat i sjell ligji, është faturë që padrejtësisht e pagoi kryeqyteti dhe qytetarët, sepse teket, inatet, interesat e subjekteve dhe politikanëve nuk pushuan asnjëherë.

Le të jemi të qartë ky është vetëm një hap, të cilin e përshëndesim, por duhet të presim dhe nëse kërkesat dhe nevojat e qytetit janë më të mëdha, ne duhet ta plotësojmë e ndryshojmë këtë ligj pas një kohe zbatimi në praktikë.

Një hap i parë dhe i mirë, por Prishtina ka nevojë për hapa të shumtë dhe të mëdhenj.

Prandaj, mjaft me politikanë, Prishtinës i duhet një menaxher.